Коомдук-саясый гезит
№52, 25.07.08-ж.
  Сап собол

НЕЛЯ:
"Келечек жолдошум романтик болсо деп тилейм"
Рубрикада мейманда - НЕЛЯ. Ырчы кыздын билген-билбегени, турмуштагы жактырбаган нерселери, кыял-тилектери жана ак жоолук боюнча да сырларынан "Сапсоболдон" кабар алыңыз.

Билесиңби?
- Уй саап көрдүң беле?
- Жок, билбейм. Саап да көргөн эмесмин. Бирок, кызыгам.
- Тандырга нан жаап же боорсок жасай аласыңбы?
- Тандырга нан жапкан таенеме жардам берчүмүн. Боорсокту сиңдилеримдин жардамы менен жасайм.
- Сары май кантип пайда болот?
- Сүттөн каймак тартат. Каймакты кайнатат, андан сары май жана чөбөгө чыгат. Таенем кичинемде мага сары майдан мыжыкма кылып берчү. Азыр бал да кошуп жейм.
- Сүзмө эмнеден жасалат?
- Айран уютулат, аны атайын бир баштыкка куюп илип койсо, сүзмө болуп калат. Курут ошондон жасалат.
- Алгачкы медициналык жардамды жасай аласыңбы?
- Мектепте, кийин айдоочулук мектепте, университетте деле окудук. Сабакта бири-бирибизге жасап көрчүбүз.
- Боз үй чечкенге аралашып көрдүң беле?
- Бозүйдү да мектептеги атайын бир сабактан толук үйрөнгөм. Бирок, шаарда жашагандыктан, бозүйдүн тигилишине да, чечилишине да катышалекмин.
Эң жаман көргөн…
- … тасма
- Боевиктер. Жан Клод Ванн Дам, Силвестер Сталлоне катышкан кинолор башталганда өчүрүп же башка каналга которо салам.
- … суусундук
- "Инвайт", "Юпи", "Тархун", ж.б.
- … ыр
- Рок. Таптакыр укпайм.
- … буюм
- Курал-жарак.
- … жаныбар
- Жаныбардан эмес, курт-кумурскалардан корком.
- … ырым-жырым
- Кара магияны жек көрөм, аны кармангандарды түшүнбөйм.
Эгерде…
- Чыгыш стилиңе карап, Болливудга иштөөгө чакырышса, макул болот белең?
- Барат болчумун. Анткени, мен индиялык тасмалардын таасиринде өстүм. Тасмага тартылуу мүмкүнчүлүгү келсе, баш тартмак эмесмин.
- Жогорку маянаны сунуштап, өз кесибиң менен иште деп, ырдоого тыюу салышса, кандай кадам жасамаксың?
- Биринчиден, мен куру убадаларга ишене бербейм. Бирок, өз кесибимди деле алып кетсем жаман болбос.
- Сага Маданият министрлигин жетектөөнү сунушташса, ишти алгач эмнеден баштамаксың?
- Негизи кичинемде апам: "Кызым Маданият министри болот" дей берчү. Алгач мониторинг өткөрүп алып, ушул тармактагы кесипкөй адамдар менен кеңешкен соң, иш планын аныктап алмакмын.
- Дима Билан артыңдан калбай ээрчип, арзуусун арнаса, кандай жооп кылат элең?
- Чындап эле Дима Биланды жакшы көрөм. Бирок, кандай болбосун, кыргыз жигиттеринен артык адамды табалбасымды так билем.
- Турмуш курган адамың криминал чөйрөсүнүн анабашы болуп чыкса, бирге жашоону уланта берет белең?
- Кудай сактасын андайдан. Эгер ушундай учурга туш болуп калсам, "Аял жакшы - эр жакшы" деп коюшат эмеспи. Туура жолго салууга аракет кылмакмын. Бирок, ушундай тагдырдан кудай сактасын! Дегеле, ушул чөйрөгө байланышкан адамдардан да, нерселерден да оолак болгум келет.
Келин болгондо…
- Үйбүлө кура турган жигиттин ата-энеси менен алдын-ала таанышат белең?
- Сөзсүз таанышып алмакмын. Анткени, бул - абдан олуттуу кадам. Турмушта бири-бирин жакшы көрүп турушса да, ата-энесинин азабынан ажырашкандарды көрүп эле жүрбөйбүзбү.
- Европалык тойду жактырасыңбы же кыргыз салты менен турмушка чыгууну туура көрөсүңбү?
- Колдон келсе, эки түрдө тең өткөргөнгө не жетсин. Мен азыртан эле келечектеги үлпөт тоюмдун сценарийин түзүп, элестете берем. Болгону алагачкандан кудай сактасын!
- Жоолук салынып жүрөт белең?
- Эгер кайын-журтум ошондой көрсөтмө беришсе, аткармакмын. Көшөгөгө да олтургум келет. Кийин эстеп алып, эйфорияга батасың да.
- Жолдошуңдун ага-эже, ини-карындаштарын тергейт белең?
- Айрым жеңелерим мени тергеп калышат. Бирок, мен уяла берем. Кайын-журттун талаптарына, ошол үйдүн салт-санаа, эрежелерине көнөм. Мен мындан бир өөн нерсе деле көрбөйм.
- Кайната-кайненеден бөлүнүп жашамак белең, же аларды багып, бирге турууга макулсуңбу?
- Канткен күндө да сый керек. Ошол сый сый бойдон сакталышы зарыл. Бөлүнүп эле түтүн булаткан оң.
- Келин болгондо деле ырдай бересиңби?
- Мен өзүмдү азыртан моралдык жактан ушул маселеден чыга турган көйгөйлөргө даярдап келем. Жолдошумдун айтканына жараша чечим чыгарам. Анын уруксатын алып, Бишкектеги ири концерттерге чыгып турам.
- Жолдошуңа эмне деп эркелейт элең?
- Романтик болсо деп тилейм. Мен күтүүсүз жагымдуу белектерди, көрүнүштөрдү жактырам. Мен көптөн бери романтик адамдарды жолуктура элекмин.

Собол салган Айнагүл САПАРБЕК кызы







Почта:janyzak@mail.ru
Тел.: +996777329784
© J.Janyzak, Kyrgyzstan