mainkaptal

Пользовательский поиск
Маскөөгө болгон сапарда мунай зат муңу чечилди
Жакындан бери күйүүчү майдын баасы акырындан көтөрүлүп, элдин маанайы түшө баштаган эле. Жакында Өкмөт башчы Алмазбек Атамбаев Орусияга болгон кезектеги расмий сапарында бул маселени чечип келди. Демек, "мунай затына болгон баа 40-50 сомго көтөрүлөт, дыйкандарыбыз жазгы талаа иштеринде кыйналып-кысталат, эл кайрадан көтөрүлөт"-деп ооз кесирлик кептерин айтып, табасы канып аткан айрым саясий күчтөрдүн тилеги таш капты. Күйүүчү жана майлоочу материалдарга болгон баа көтөрүлбөй турган болду. Мындан сырткары премьер-министр Алмазбек Атамбаев орусиялык кесиптеши Владимир Путин менен Кыргызстан үчүн бир топ мыкты келишимдерге кол коюп кайтты. Эң маанилүүсү - Орусия өлкөбүзгө 30 миллион доллар үстөгү жок жардам көрсөтүп, мурунку карыздарыбызды кечүү боюнча бир катар алдын ала сүйлөшүүлөр жүргүзүлдү. Өз сөзүндө орус премьери Владимир Путин: "Кыргызстанга учурда оор болуп тургандыгын түшүнүп атабыз. Саясий абалыңар дагы деле олку-солку болуп турат, өлкө экономикасы да сизге талкаланган абалда колуңузга тийди. Ошого карабай буга чейинки эки өлкө ортосундагы келишилген келишимдер боюнча бир топ жакшы иштер жасалды. Биз муну көрүп турабыз. Орусия Кыргызстанга өткөн жылдын май айында 20 миллион, октябрь айында 10 миллион доллар кайтарымсыз грант түрүндө акчалай жардам берген. Дагы да жардам беребиз. Бирок эң башкысы бул эмес, эң башкысы биз эки өлкө ортосундагы товар алмашууну 1,4 миллард долларга жеткирдик. Дал ушул багытта иш алып барып, нормалдуу экономикалык алака түзүүгө аракет кылышыбыз керек"-деди.


"Ата-Мекен" "Фабуланы" сотко беребиз дейт
"Ата Мекен" партиясы өткөн жумада "партиябыздын жана лидерибиздин ар-намысына шек келтирди" - деген дооматы менен биздин гезитти сотко бермекчи болушканын шардана кылышты. Албетте, биз дагы өз чындыгыбызды жаздык, эгер андай эмес дешсе, аларга да орун берилмек. Бирок ата мекенчи "досторубуздун" түз эле сотко сүйрөгөнүнө караганда, айтчу кеби чамалуу окшойт. Эмнеси болсо да биз соттошуудан качпайбыз, коркпойбуз дагы. Ар дайым эл тарапта болуп келген "Эл сөзү", "Форум" азыркы "Фабула" гезитинин мизин Бакиевдердин соту да, огу да майтара алган эмес. Азыр да майтарылбайбыз. "Ата Мекендеги" айрым тентектеринин тескери иштери, кимдин кандайча байыганы, кайсы эл мүлкүн кандайча басып алганы, ал былык ишти ким аркылуу жаптырганы, айтор, толгон-токой былыктуу маалыматтар бизде жетиштүү. Анын үстүнө учурда кымбат баалуу машине минип, кычыраган үйлөрдө жашап, шагыраган күзөтчү жигиттерди жандатып, өзүнчө эле көпөстөргө айланып алышкан айрым ата мекенчилер мындан туптуура бир жыл мурун кандай жашаганын башкасы билбесе дагы, биз эң жакшы билебиз да. Айрым ата мекенчи "досторубуз" тууралуу айтылчу кеп али алдыда…


"Мыйзамдагы ууруну" мыйзамчылар коргойбу?
Акипресс маалымат агенттигинин кабарына караганда, март айынын башында Кемин районун Муздак суу аймагынан милиция кызматкерлери "вор в законе" Камчы Көлбаевдин 17 жашар уулу Нурсултан айдап бараткан күмүш түстүү "Мерседес-Бенц-320" үлгүсүндөгү автоунааны токтотуп, тинтүүгө аракет кылышкан. Бирок артынан коштоп келе жаткан "Мерседес-Бенц-600" автоунаасынан ЖК депутатымын деп тааныштырган бир эргул чыгып, кызыл шапкечендерибиздин оозун жап кылган. Ыйгарым укуктарын пайдалынып, Камчы Көлбаевдин уулун коргоп, милицияларды коркутуп-үркүткөн эл өкүлүнүн аты-жөнү азырынча атала элек.


Паракорлордон жапа чеккендер "anticorr.gov.kg"ге кириңиз!
Кыргызстандын тарыхында коррупцияга каршы эң алгачкы маалымат сайты 18-март күнү ишке кирди. "Бөйрөктөн шыйрак чыгарып", жок жерден акча өндүрүп алгысы келген паракорчулардын бет пардасын ачып, чыныгы жүзүн элге алып чыгуучу anticorr.gov.kg деп аталган сайтты колдонуу жөпжөнөкөй. Пара сурап акча өндүрөм дегендердин абийирин ачам десеңиз, аталган сайтка баш багып, окуяны төкпөй-чачпай баяндап, документтери же видеосу менен болсо, аларды кошо тиркеп жөнөтсөңүз, сиздин арызыңыз бир убакта үч дарекке: КРнын Президенттик аппаратынын жарандар менен иш алып барган бөлүмүнө, КРнын Президенттик аппарат жетекчисинин биринчи орун басарына жана Биринчи вице-премьер министрдин жардамчысына келип түшөт. Сайттын ачылышында Биринчи вице-премьер-министр Өмүрбек Бабанов: "Көп жылдан бери өлкөбүздүн өнүгүшүнө тоскоолдук кылып келген паракорчулукту жоюу үчүн коомчулук менен өкмөт бирге иш алып барышы керек. Коррупцияга каршы күрөшүү үчүн коомчулукту ушул жаңы интернет ресурсун колдонуп, Өкмөткө жардам берүүсүн көптөн-көп суранат элем"-деди.


Эшимканов эски ордун эңсегенде…
Былтыр 7-апрелден кийин чээнге кирип кетип, бир жылча жашынып жатып өзүмдү өзүм люстрацияладым деп пайда боло калган Эшимканов акыркы күндөрү "кара жащиктеги" эски ордун эңсеп, катуу ээлигип жатканын уктук. "Маалыматтык чабуулду" кантип жасашты мыкты өздөштүргөн Мекеңдин кылганыбы же жөн эле кокустукпу ким билсин, айтор, акыркы күндөрү КТРКнын учурдагы чоңу Кубат Оторбаевдин кыздар менен "кыйшаңдаганы", дискотекаларда тайраңдаганы тууралуу имиш кептер айрым ММК беттеринен түшпөй калды. Кубат мырзаны оодарыш үчүн ЖоКедеги кубаттуу саясатчы досторун да ортого салып, жашыруун сценарийлер түзүлүп, тымызын оюндар башталганы да айтылууда. Айтор, Эшимканов катуу ээликти дешет, аягы кандай болор экен, байкап туралык…


Коалициядан чыкпайбыз дейт…
Депутаттык мандатына алымсынбай, мансапка жетпей калган айрым саясатчыларыбыздын "Өкмөттү таратабыз, коалициядан чыгабыз"-деген чыры дагы деле басылбай келет. Бирок өткөн жумада "Ата-Журт" партиясынын мүчөсү Нурлан Сулайманов: "Коалициядан чыгабыз деп чырдап атышкан айрым ата-журтчулардын жарымы бир катар сүйлөшүүлөрдөн кийин бул оюнан кайтышты. Өлкөдөгү саясий туруктуулукту сактап калыш үчүн өткөн жылдын декабрь айында түзүлгөн коалициялык союзду ыдыратпоону чечтик"-деди. Ал эми "Ата-Журт" партиясынын аталыктарынын бири, ЖК төрагасы Акматбек Келдибеков 18-март күнү бизнесмендер менен болгон жолугушуусунда, Коалицияны кулатабыз деп атышкан айрым саясатчылар жеке амбицияларын акыл-эс менен жеңип, терең ойлонушу керектигин айтып, Ташиев, Түлеев өңдүү өнөктөштөрүнө, Жапаров, Текебаев сыяктуу кесиптештерине эскерткендей болду. Кандай болгон күндө да, азыркы өкмөттү кулатып, коалицияны таратабыз дегендердин түпкү максаты ачыкка чыгып калды. Эгер эле күзгө чейин тим коюшса, анда экономика кыйла өсүп, мугалим, дарыгерлер, дегеле, казынанын оозун карагандардын айлыктары 3 эсеге жогорулап, дыйкандар эзели болбогон 9 пайыздык кредитти алып кетсе, азыркы оппозициянын айтканын ит угабы. Ошондуктан ушу баштан иштөөгө мүмкүнчүлүк бербей, эптеп шылтоо таап өкмөттү кулатууну каалап турушат. Эмнеси болсо дагы, коалициянын тагдыры эртеңдерден ачыкталып калышы мүмкүн.


Башкы прокуратура Байболовдун менчигиби?
Бакыйып башкы прокурор болуп отурган Байболовдун акыркы күндөрү айбаты катуу чыкты. "МегаКом" жана ага байланышкан "жашылбайлардын" арасынан башкы прокурорубуздун да кулагы көрүнө баштаганы айтылып келет. "МегаКомдун" кызматтан түшүп калган чоңу Азамат Мурзалиев Кукеңдин жубайы Нуржамал Байболова "МегаКомдон" 400 миң доллар шыпырыптыр деп чыкты эле, анысы ошол замат теледен чыгып, Мурзалиевди сотко берем деп катуу опурулду. Анысын го өздөрүнчө чечишип алышат деңизчи, бирок байболгур Байболовуң кечээ эле Максимге баш ийип, жанында жандап жүргөн Силичти бир заматта аппак дей салып, ага карата козголгон кылмыш иштерин жаап, кайра А.Мурзалиевге, Т.Кызалаковго иш козгоп салганы көптөгөн күмөн ойлорду туудуруп атат. Сыягы, Байболов мырза прокуратураны өз менчигин, аялын, партиясын коргой турган жеке ишканасына айландырып алган өңдөнөт. "Чыга турган көз эле, чыгып кетти өзү эле" демекчи, буга чейин эле бышып турду эле, эми Роза эжекебиз Кубатбек мырзаны арыдан бери кылбаса болбойт го.






кыргыз тилиндеги гезит "Форум"
Яндекс.Метрика