mainkaptal
Пользовательский поиск
Байболов кетмек эле…
Кандай гана мамлекет болбосун Башкы прокурор деген кызмат аябагандай абройлуу да, аябагандай жооптуу да кызмат. Бул кызматка барчу адам өзүнүн басып өткөн жолун аябай кылдат таразалап, "ушул кызматка татыктуумунбу, уят болуп калбаймынбы, басып өткөн жолум бул кызматта иштөөгө жол береби" сыяктуу толгон санаркоо менен барат. Бул башка мамлекеттерде болчу көрүнүш дейли.
Ал эми биздин мамлекетте болсо, арты булгангандын баары эле чоң-чоң кызматтарга улунуп-жулунуп турат…
Бакиев бийлиги кутуруп турганда аз-маз какыс-кукус кылынган Байболов ал көрүнүштү "мени атып жок кылганы жатат" дегенге чейин жеткизип, Америкага кире качкан. Бул жерде оппозиционерлердин башында тургандардын өмүрү коркунучта турганда, Байболов тиги Америкасынан ресторан сатып алып оокатын кылып жаткан. Анан революция болуп, Байболовуң жетип келди да аз өтпөй башкы прокурордук орунга уялбай эле баса олтурду. Ал ал болсун. Бирок бул орунда ал кээ бир келемиштерди "крышалап" жүргөн тура. Маселен, "МегаКомдогу" Максим Бакиевдин адамдарын колдогонун айталы… бекер эмес да анан…
Аталган иш аябагандай чоң чырга айланып баратканын билген президент Отунбаева 16-мартта Мамлекеттик коопсуздук кызматына аталган ишти тапшырат. Ал кызмат ишти изилдеп чыгып, Байболовдун аялы Байболовага "кылган кызматын" таап чыгат. Сөз кыскасы, кечээ Байболов мырза башкы прокурордук орунунан учуп түштү, болмок эле болду.
Байболовдун ордуна президенттин парламенттеги өкүлү Аида Салянова убактылуу шайланып олтурат. Биздин баамда Салянова ишин билген, анан да мыйзам аркалап иштеген адам.
Кыргыз тарыхында Салянова башкы прокурор болгон экинчи айым. Биринчиси Чолпон Баекова болчу. "Баекова баскан жолду баспасын, ал жасаган иштерди жасабасын, Конституцияны бузуп туруп Акаевди үчүнчү мөөнөткө шайлаткандай иштерди жасабасын, иши ийгиликтүү болсун!" - деп бата тартып жиберген аксакалдар да болуп жатат.


Масалиев президент болсо, казинолорго майрам…
Мамлекетти төңкөрмөкчү болгон акеси Үсөн Сыдыков менен телефон аркылуу сүйлөшүп, анын айткандарына "макул" дей берип сотко тутулуп, анан араң кутулган Исхак Масалиев бир гезитке маек берип, "президенттик шайлоого катышасызбы" - деген суроого: "Талапкер боломбу, же башка бир талапкердин штабында иштейминби, азырынча чечиле элек" - деген жообун берет.
Туура, ар ким мыйзам чегинде каалаганын кылат. Масалиевдин президенттикке барары же барбашы өзүнүн жеке иши. "Он жылдан бери саясатка аралашып келем"- деп мактаныч кылганы менен, ошол саясатта орчун кайсы ишти жасады? Санай албай турабыз. Ал эми кайсы казинодон канча уттурду дегенди көптөн бери талкууга алып келген "электораты" көп. Ошондон улам суроо туулат, эгерде Масалиев президентикке шайланып калса, мамлекетибизди кумар оюндарга аралаштырып жибербейби, же одоно айтсак мамлекетибизди уттуруп жибербейби?! Коркунучтуу суроо… Демек, анын президенттикке ат салышы дагы коркунучтуу го деп арсарсып-санааркап койсок болот.
Бакиев тушундагы парламенттик шайлоодо "Ата Мекендин" ордун уялбай эле ээлеп келгенин жана бакиевчилердин "Ак жол" партиясына гарнир болуп жүргөнүн эли унута элек. Жогорудагылардын баарын анализдегенде эле Масалиевдин кандай деңгээлдеги саясатчы экенин сыпаттап алат.


Оо-уу, 12 миң эле евро экен
Укмуштуудай ушак уктук. Айта кетсек, "Манас" аэропортунун мурунку алты директору чай үстүндө чардашып, бири-бирине белек тартуулашат имиш. Алардын бирөөсү экинчисине колундагы кол саатын белекке берет экен. Алтындан жасалган ал сааттын баасы араң эле 12 миң еврону басып жыгылыптыр. Айрымдардын айтымында, ал жердеги директорлордун бир күндүк кирешеси ошол сааттын баасына барат дешет. Демек, экс-директорлордун мындай белектери алар үчүн арзыбаган акча тура. Атаң гөрү, эмнеге эле аэропорт дегенде алаңдашат десек, акча дегениң ал жакта "море" турбайбы! Алтын сааттын эски ээсин да, жаңы ээсин да жакында кабарлайбыз.


Ачып-жапмайбы же акча тапмайбы?
Өткөн аптада Бабановго эрегишип калган Байболовдун Башкы прокуратурасы азыркы коалициянын төрагасы Канат Исаевге карата кылмыш иши кайрадан ачылгандыгын кабарлаган. Арадан апта айланбай жатып, Канат мырза Башкы прокуратураны, анын жетекчиси Байболовду ушундай "урдурду" дейсиң, Башкы прокуратура ачылган кылмыш иши алеки заматта жабылганын жар салышты. Ушундай укмуштарды көрүп-угуп жаткандан кийин, Атамбаевдин "булар крысаларга крыша болуп алышыптыр" кыязында айтканы чын окшобойбу.
Ал ортодо, "Садыркуловдун өлүмү боюнча иштин этегине чыкмайы бул жерден кетпейм" таризинде кесир сүйлөп алган Кубат мырза кечээ президенттин жарлыгы менен кызматынан оодарылды.


Нариман "үй-бүлө" сырын ачыктады
Минскидеги "атакесинин" баласы "Ата-Журттун" бакандай депутаты Нариман Түлеев кечээ ЖКнын кезектеги жыйынында Ош базарындагы соодагер-митингчилердин маселесин карап жатып "Муниципалдык базар курууга мэрияда азыр акча жок. 2008-2009-жылдары мен мэр болуп турганда Абдрахманов-Жибек Жолу көчөлөрүнүн кесилишиндеги 1,5 гектар жерге базар курууну көздөгөм, бирок ал жерди Максим Бакиев тартып алган. Ошол жерди мэрия Ош базарынан сүрүлүп калган соодагерлерге бериш керек"-деди. "Бул бирөөнүн менчиги да"-деп алакан жайган кесиптештерине, "үй бүлөнүн" жашыруун сырларын жакшы билген Нарикең "Ал жерлер Курманбек Бакиевдин экинчи аялынын менчиги"-деп укмуштуу жаңылыгын жар салды. Ошентип Маевка, Дордойго "айдалмакчы" болуп, айласы кетип аткандарга жакшы жол таап берди. Эл өкүлдөрүбүз эми Бакиевдин токолунун гектарлаган жерлерин кимдин пайдасына чечип беришээр экен?


Үчөө кармалды, экөө издөөдө
Саламаттыкты сактоо министрлиги Чым-Коргондон качкан беш адамдын үчөө кайтып келгенин билдирди. Маалыматка ылайык, эки оорулуу өз эрки менен келсе, бирөөсүн тартип коргоо кызматкерлери алып келген. Ушул тапта дагы эки оорулуу издөөдө жүрөт. Эске сала кетсек? 25-мартта Чүйдүн Чым-Коргон айылындагы психикалык ооруканадан 5 адам медициналык кызматкерлерге кол салып, уюкфонун, акчасын тартып алып качып кетишкен. Бешөө тең соттолгон жана сот чечими менен "акыл-эси ордунда эмес" деп табылып, күчтөп дарылоого жөнөтүлгөн болчу.




Барктабасов бошосун, эртең кайра келүүгө…
"Эчки тууй албай жатып, койго арачы болот" деген макалды ушул жерге колдонсо болобу, же болбойбу так эрежесин билбей турабыз, бирок айтчу маселебизге анча-мынча тиешеси бар өңдөнөт. Мындай анан: Жогорку Кеңештин ынтымагы жакшы жагында даана болбой, коалиция бузулат-бузулбайт болуп, депутаттардын бири-бири менен болгон чабышуулары өкүм сүрүп турган убакта, ошол парламент кепилдикке өтүп камакта жаткан Урмат Барыктабасовду үйүнө чыгаруу маселесин көтөрүп жатат. Барыктабасов жакында эле бөйрөгүнөн таш алдырган.
Мамлекетти бир эмес, эки ирет басып алам дегенди деле, революциядан кийин контрреволюция жасоого аракет кылганды деле, миллиондогон акчаны жеп кеткенди деле, айтор, баарын-баарын бошото бериш керек. Анткени биздин өлкөдө мыйзам дегендин ордуна "гуммандуулук" дегениң үстөмдүк кылып турганда Барыктабасовду үй камагына эмес, биротоло бошотуп жиберүү керек.
Маселе ушул: анан бошотулгандын "взяткасын" ким алат?!


кыргыз тилиндеги гезит "Форум"


ПОИСК ГАЗЕТЫ