Кыргыз гезиттери



Топчуке толкуп туру
Демократ Топчуке Тургуналиев жетектеген ""Манас"- кино эпопея" Эл аралык уюм тарабынан даярдалган "Манас" эпосу жөнүндөгү" мыйзам долбоору ЖКнын атайын комитети тарабынан жактырылды. Бул долбоорду түзгөндөрдүн ою боюнча, "Манастагы" улуу ой- максаттар-Кыргызстандын мамлекеттик тили улуттук идеологиянын пайдубалы болуусу керек". Анткени, ыдырап турган улуттун биримдигин камсыз кылуу жана түпкү улут кыргыз эли менен башка биз менен мекендеш улуттук топтордун ынтымагына жетишүү үчүн кыргыз тили гана курал болуп бере алмакчы.
Баса, ошол эле "Манас"-кино эпопея" Эл аралык уюму ушул жылдын 26- февралы күнү кечки сат 18:00дө Т. Сатылганов атындагы улуттук филармонияда соопкерчилик концертин өткөргөнү жатат. Бул акысыз концертке кыргыздын аттуу -баштуу акындары, ырчылары, манасчылары, эстрада жылдыздары, комузчулар менен куудулдар катышып, элге таланттарын тартуулоого макул болушуптур Кыргыздын руху, духу жыттанган бул кечеге келген да арманда, келбеген да арманда!

Мамлекетти майдалабай башкаруу!
Сандан сапатка өтүп, мамлекеттик бюджеттин чыгымдарын азайтуу менен бирге, иштин эффектисин көрсөтүү керек! Дал ушул масатты көздөгөн Мамлекеттик башкаруу системасын оптималдаштыруу боюнча комиссия өз ишин кечээ баштады. Алгачкы отурумга өлкөнүн биринчи вице-премьери Өмүрбек Бабанов катышып, Өкмөттүн атайын токтому аркылуу түзүлгөн бул комиссия жакынкы аралыкта коомчулуктун суроо- талабына жооп берген, заманбап базар экономикасынын өнүгүү тенденцияларынын талаптарын эске алган мамлекеттик башкаруу системасын иштеп чыга турганын белгиледи. "Азыр өлкө казынасынын теңинен көбү мамлекеттик башкару органдарына жумшалат. Бирок, иштин жыйынтыгы эл күткөндөй эмес. Буга кошумча биз заманбап башкаруу технологиясынан аксап келебиз. Андыктан сапаттуу башкаруу системасын киргизип, заманбап кадрлар, иш билги адистердин аракети менен өлкөнүн өнүгүүсүнө багыт алышыбыз керек. Буюрса, бул комиссия ушул жылдын сентябрь айына чейин биз күткөн долбоорду иштеп чыгат",-деди Ө. Бабанов.
Ал белгилегендей, мамлекеттик башкаруу системасын оптималдаштыруу иштеринин алкагында учурда Мамлекеттик каржы полициясы кызматы, КРнын өзүн-өзү башкаруу боюнча Улуттук агенттиги, КРнын Улуттук аттестация комиссиясы, КРнын Социалдык фонду, КРнын Жеке менчик боюнча кызматы Президенттин башкаруусунан Өкмөттүн башкаруусуна өткөрүлүп берилген.
Кыскасын айтканда, быйылкы жыл мамлекеттик бирин-бири кайталаган, казынадан олчойгон каражат сурап, ага жараша иш аткарып, элдин жашоосуна пайдасын тийгизбеген бир топ органдар кыскартылмакчы. Бул болсо нечендеген миллион акчалар социалдык турмушту жакшыртууга жумшалат деген сөз.

Кесиптешке кербен тост!
"Асабанын" аргымагы менен журналистиканын кыз куумайына түшүп, кийин "Агымдын" ардактуу айымына айланган, акыры келип "Айат" аттуу аруу гезитин ачып, аламан жарышта алдыга озуп чыккан кесиптешибиз Жылдыз Мусабекованын 23-февраль- туулган күнү. Элим дегенде эркектерди басып өтөр эр жүрөктүк, намыс менен чечкиндүүлүк ошондон болсо керек. Андан да кызыгы, Жылдыз айымдын туулган күнү атпай кыргыз агасы, акын Шайлообек Дүйшеевдики менен бир күнгө туш келет экен. Ата-баладай ээрчишип, сыйдан жазбай кастарлашып жүргөнү төгүн жерден эмес тура! Эмесе биз "Лозунг" гезитинин эмгек жамааты кесиптештерибизди туулган күнү менен куттуктап, ага Ат-Башынын тоолорундай бийиктикти, мөңгүлөрүндөй көтөрүмдүүлүктү, булактарындай тазалыкты каалайбыз. Бар болгула, кыргыздын бакандай уул-кызы!

Бакиевдердин баары баңгибаронбу?
Кыргызстандын аймагынан өткөн баңги трафигине мурдагы президент Курманбек Бакиевдин жакындары көзөмөлчүлүк кылып келген. Бул сөздү ОДКБнын башкатчысы Николай Бардюжа айтып өттү. Анын сөзүнө таянсак, экс-президент Курманбек Бакиевдин тушунда анын жакындары өз кызыкчылыктары үчүн баңгизатына каршы күрөшүүчү мамлекеттик агенттикти жаап, күч структураларына өз кишилерин коюу менен бүтүндөй баңги трафигин өз колдоруна алышкан.
"Учурдагы Өкмөттүн чечкиндүүлүгү менен аталган кызмат калыбына келтирилип, акыркы айлардын ичинде эле бир канча баңги кербендери колго түшүрүлдү. Бирок, биз бул ишке каршы күчөтүлгөн иштерди алып баруу үчүн ар тараптуу жардамдарды беришибиз керек",-деп айтты Бордюжа.
Бирок, ал азыркы учурда деле бакиевдердин айрымдары Памир тоолорунун карагай черлерине жашынып алып, баңги ташуу иштери менен алек болуп жаткандыгын негедир айткан жок. Коомчулукта болсо, мындай такталбаган маалыматтар өткөн жылдын май айынан бери эле үзгүлтүксүз айтылып келүүдө. Божомолдорго караганда, мурдагы күзөт кызматынын башчысы Жаныш Бакиев Кыргызстан, Өзбекстан жана Тажикстан мамлекеттеринин чек араларында ар кандай уюшкан топтор менен бирге баңги кербендерин жөнөтүү менен шугулданып келет...






кыргыз тилиндеги гезит "Лозунг"




Яндекс.Метрика