п»ї
 Таанышуу жарыясы


  Кумир менен баарлашуу

Назира Айтбекова:
"Жолдошумдун татынакай студенткалары көп"
"Кумир менен баарлашуу" рубрикабыздын бүгүнкү коногу тилинен чаң чыккан телеалыпбаруучу Назира Айтбекова.

Айзада, 23 жашта:
- Чыгармачылыктан такыр эле алыстагандай сезилесиз. Кайда жүрөсүз?
- Чыгармачылыктан алыстай элекмин. Учурда "Түрк телевидениесинде" 1 сааттык "Ата Журт" деген берүүдө эмгектенип жатам. Башында түрк тилинде алып барып жүрдүм. Бирок кийин "ар бир өлкө өз тилинде алып барсын деген" токтом келгенден бери кыргыз тилинде алып барып жатам.
- Түрк тилинен да башка тилде божурасаңыз керек?
- Ии, англис тилинде, орус тилинде сүйлөйм.
- Азыр кайра ал жакка барайын деген оюңуз барбы?
- Журналист болгондон кийин бир эле жерде иштей бербестен, убакыт өткөн сайын улам-улам жаңыланып туруш керек, өзгөрүш керек, өсүш керек. Ошон үчүн буюрса дагы алдыда жаңы долбоорлор сунуш кылынып жатат. Дагы көрө жатабыз го.
- Анда күйөөңүз сизди абдан кызганат окшойт да?
- Негизи кызганат эле.
- А сизчи?
- Оо-уу, мен аябай кызганам да. Жолдошум университетте мугалим болгондуктан жаш, татынакай студенткалары көп. Кээде кырктан ашып калган студенттери "Саламатсызбы!" дегенде уялып да кетем.
- Жолдошуңуз кайсы сабактан берет?
- Негизи 16 ири компанияда консультант, Президенттин алдындагы башкаруу академиясында "Маркетология" сабагынан сабак берет, ж.б. билим берүү борборлорунда да сабак берип иштейт.
- Сиздин чыгармачылыгыңызды колдойбу?
- Ооба, болгондо да аябай колдойт. Сырткы стилимден бери карап турат.
- Жолдошуңузду эмне деп эркелетесиз?
- "Жөжөм" деп эркелетем. Балам төрөлгөндөн кийин баламды да "жөжөм" десем, "Мыймый эмне болду?" деп ал чуркап келе калат. Азыр болсо, сен чоңоюп калбадыңбы "Шумкарым" дейм, - деп калам.
- Сиздин чыгармачылыгыңызды кайын-журт кандай кабылдашат?
- Алар менин телеалыпбаруучу экенимди билишпейт деле. Конокторго барып, же башка туугандарга кезигип калганда "Иий, келин бала Назира Айтбекованы тааныйбыз. Телевизордон көп көрөбүз" десе эле, кайнежем "Сен ошондой белең?" деп таң кала берет. Аларга деле билдирбейм. Жалаң орусча сүйлөшөт. КТРди көп деле көрүшпөйт.
- Алардын көзүнчө жоолук салынасызбы?
- Башында жоолук салынып, халат кийип жүрсөм, күйөөм урушуп: "Апа, бул эмне деген кебете? Мен мындай аял алам деген эмесмин. Меники сулуу болуп турушу керек. Жоолугу эмне дейт, айылдагы келиндердей болуп" деп, урушуп атып, акыры чечтирип салды. Кайнежемдер да көнбөй койду. Эрте туруп, чай даярдап жүгүнсөм, "Бул эмне? Жүгүнбөй эле кой. Сен бизге келин эмес эле, сиңди болосуң" деп, жүгүндүрбөй да коюшкан.
- Негизи, өзүңөр салтты кандай кармайсыздар?
- Өзүмдүн ата-энемдин үйүндө салтты катуу кармашат. Таенемдин келиндери 30 жылдан бери күн сайын жүгүнүп турушат.
- Төркүнүңүзгө канча убакытта бир каттап турасыз?
- Апам Бишкекте жашагандыктан баттан эле каттап турам, апам да биздикине келип-кетип турат.
Алина, 20 жашта
- "Бравого" кандайча келип калдыңыз эле?
- Ал убакта мен студент болчумун. Балыкчыдан жаңы эле келген, жөнөкөй. Ал жактан "Ушул шаарды багындырам!" деп келгем. Бир күнү эле КТРде сынак жүрүп жатат дегенди угуп, мен дагы барып көрөйүнчү деп баргам. Динара эже: "Экөөңөр сүйлөшүп көргүлөчү?" дегенде мен да "быдылдап", Алексей Филатов да өз оюн бербей кечке айтышканбыз. Ошондо, Динара эже көзүнөн жаш аккыча күлгөн. Жалаң узун бойлуу кыздардын баары өтпөй калып чыгып жатканда, мен акыркы калган элем. "Ушулар өтпөсө мен өтмөк белем" деп кирген болчумун. Бирок, өтүп кеттим.
- Бала эмизгенде алгач кандай сезимде болдуңуз?
- Боюмда бар кезде бала эмизип жаткандарды карап алып, "Ий, кантип эмизишет?" деп итиркейим келе берчү. Ариетти курсагыма жаткырганда эле ээмп киргенде "Атасын тартып тамаксоого" деп каткыргам.
- Балаңыздын атын Ариет деп ким койду эле?
- Искен "Кыз төрөлсө мындай коём, эркек төрөлсө тигиндей коём" деп башынан эле өзү коюп алыптыр. Досу экөө жарышып жүрүп, "Ким биринчи уулдуу болсо, аты Ариет болот" деп мелдешип да жүрүшүптүр. Анан биздики биринчи финишке жетип, Ариет болуп калды.
- Бактылуусузбу?
- Албетте, абдан бактылуумун. Мурун турмушка чыга электе, "Кыздар турмушка чыккандан кийин күйөөсүнүн байпагын жууйт, тамак жасайт, күйөөсү ичип келсе урат" деген ой менен жүрчүмүн. Апам мага "Мен өзүмө бакытты тилебей калыптырмын. Сен бакыт тилегенди унутпа" деп көп айтчу. Баскан-турган сайын, эртең менен эрте туруп алып өзүмө бакыт тилей берчүмүн. Кудай мен каалаган нерсенин баарын аткарды. Бир жолу курбуларым болуп отуруп, "салфеткага" келечектеги күйөөбүздүн бою, салмагы, иштеген иши, аты, кандай кийиниш керектигинен өйдө жазып коюптурбуз. Турмушка чыккандан кийин карасам, мен жазган сөздөрдүн бардыгы дал келип жатпайбы. Болгондо да салмагын кудайды карабай 90 килограмм деп коюптурмун да. Ошондой болуп, азыр Искен 90 килограмм.
- Макал менен сүйлөгөнүңүздүн сыры эмнеде? Же макалдарды жаттап алдыңыз беле?
- Өзүмдүн апам макалдарга абдан чукул адам. Менин канымда барбы же, үй-бүлөм ушундайбы, айтор, макалдаштырып сүйлөп жатканымды деле сезбей калам. Кайнежем эле күлө берет- ал эмне? - деп. Куйма кулак болушум керек. Бир нерсени угуп калсам, көңүлүмө түйүп калам. Мурун, сахнада сүйлөп алып, "Ушуну мен сүйлөдүмбү" деп таң калчумун.
- Ырга кандайсыз?
- Мурун комуз чертип республикалык деңгээлге чейин ырдап жүрчүмүн. Кийин эле, аны калтырып, алыпбаруучулукка ооп кеттим. Ырчылыкты өркүндөтүү тууралуу жолдошумдун да, апамдын да кыялы. Жолдошум, "Сенин үнүң бар, ырдашың керек. Мен сага ыр жаздырып берем, аранжировка жасатып берем… Клип тарттырышыбыз керек" деп өзүн продюсер сезип алды.
- Жолдошуңуздун кайсы сапатын баалайсыз, кайсы сапатын жактырбайсыз?
- Акылдуулугун баалайм. Кыз кезимде эле күйөөм менден бардык жактан өйдө болсо экен, - деп тилечүмүн. Искен кандай тема болбосун, жакшы маек куруп берет. Сабырдуулугу да жагат. Жакпаганы, куулугу жок. Башка эркектер өзүнүн планын айтпай, кууланышат го. Меники эмне болсо, ошону "балп" этип айтып салат. Анан компьютердей, кандай программаны киргизсең, ошону аткарат. Дүкөнгө да 3 помидор алып келчи? - десең, 3 помидор гана алып келет. Дагы жакшы, каадаланып, "ойлонуп көрөйүнчү" дебей эле "ооба тийем" деп айткам. Каадаланып койсом, артыман чуркабай кетип калмак экен, - деп тамашалап калам.
- Сизден кийинки муундагы телеалыпбаруучуларга эмне дейт элеңиз?
- Азыркы алыпбаруучулар абдан тырышчаак. Мен телеге жаңыдан чыга баштаганда сындарды аябагандай көп уккам. Бирок, сынды да туура кабыл алган жакшы. "Көч бара-бара түзөлөт" дегендей, өздөрүнүн үстүнөн көбүрөөк иштесе, өнүгүү болот деп ишенем. Бизге жылдыз болуш опоңой. Бирок, ошону элек кылып элеп, ташын тегирменден өткөрсө мыкты адистер чыкмак.
- Кино жаатында жакшы сунуштар түшүп калса тартылат белеңиз?
- Эгер Эрнест Абдыжапаров, Нурбек Эгенден түшсө макулдугумду берем. Ошондой эле тил билгендиктен чет өлкөдөн сунуш түшсө тартылмакмын. Комедияны, күлкүлүү адамдын образын, желмогуздун ролун аткармакмын.
- Ойноштун ролун сунуштап калсачы?
- Жок, андайга дитим барбайт. А эгер жолдошуң менен ошондой нерсеге бар, - десе, тартылмакмын.

P.S. Назиранын окурмандарынын көпчүлүгү жайкы эс алууда болгондугуна карабастан, анын чыгармачылыгын баалагандар келип, өздөрү кызыккан суроолорун бере алышты.
Төлөбүбү Касымалиева





кыргыз тилиндеги гезит "Обон"









??.??