п»ї
 Таанышуу жарыясы


  Тамаша айтсам күлөсүңбү?

Мени Гүлмира деп эч ким тааныбайт…
"Күлкү - ден соолуктун мүлкү" дегендей, адам канча жолу күлсө, жашоосу ошончо узарат экен. "Обондун" тамашасына бул жолу "Кызыл гүл" деген ыры менен элдин жүрөгүнөн орун алган "Кеңеш" тобунун солисткасы Гүлмира айым чалынды.


- Алло Саламатсызбы?
- Саламатчылык, ким бул?
- "Кеңеш"тобундагы Гүлмира деген силер болосуңарбы?
- Ооба, мен болом, ким бул?
- Саламатсызбы эже, кечиресиз, тынчыңызды алып койсом. Тоскоол кылган жокмунбу?
- Жо-ок.
- Мен "Полак акс" түрк фирмасынан чалып жатам. Бул компанияда котормочу жана генералдык директордун жардамчысы болуп иштейм. Менин жетекчим Арслан Юсманович, сиздин ырдаганыңызды жактырып калган окшойт. "Монте Карло" деген ресторанда өзүнүн туулган күнүн белгилеп, ырдап беришиңизди өтүнүп жатат.
- Качан?
- Келе жаткан дем алыш күнү. Келип ырдап бере аласызбы?
- Мен жалгыз ырдабайм да.
- Сизди, жетекчим жактырып калган окшойт, келип ырдап берсеңиз, жакшы болмок, акчасын да жакшы төлөп бермекпиз.
- Саат канчага чейин болот?
- Кечки саат 8 де башталып, түнкү саат 2де бүтөт.
- Экиге чейин?(таң калып)
- Ооба.
- Менин телефонумду силер каяктан алдыңар?
- Сураштырып таптык, бизге сизди тап деп буйрук берген да жетекчим Арслан Юсманович.
- Арслан Юсманович деген ким?
- Ал менин жетекчим болот. Өзүңөр билесиңер да биз жардамчы болгондон кийин бардык нерсени жасашыбыз керек да.
- Иии, түркпү?
- Ооба, түрк улутундагы бизнесмен. Туулган күнүн өткөрүп жатты эле.
- Түрк кишиби? Ха-ха-ха
- Сиздин ырдаганыңызды жактырат экен.
- Мени жактырат экенби? Мен жалгыз ырдачу эмес элем го…
- Сиздин жалгыз ырдаган ырларыңыз жокпу? Мен деле сизди жакшы тааныбайт экенмин. "Кеңеш" тобундагы Гүлмира керек дегенинен эле сизге чалып жатам.
- Ха-ха-ха, Ким айтты?
- Сиз келип, жалгыз ырдасаңыз жакшы болмок да.
- Эмнеге?
- Ырларыңызды аткарып коюп, алар менен чогуу отурмаксыз да.
- Мен каякка отурушум керек. Негизи мындай нерселерди Мүзүргө чалып, сүйлөшүшчү эле. Күйөөм менен сүйлөшпөйсүңөрбү? Мага мындай суроо менен эч ким чалчу эмес.
- Эмнеге?
- Мүзүр эле сүйлөшүп, бардыгын өзү чечет. Мени кантип таптыңар, телефон номеримди жакында эле сатып алган элем го.
- Чыгармачылык жакта тааныштарым бар, ошолор аркылуу тапкам.
- Мен ошондой кыйын болуп кетиптирминби ээ? (күлүп)
- Сизди фигурасы да, өңү да "гузаль" деп айтып жатышат го.
- Гузаль ким ал?
-"Гузаль" деген сөз түрк тилинен которгондо сулуу дегенди түшүндүрөт. Негизи "Кызыл гүл" деген ырыңыз бар беле?
- Ооба бар. Силер мени тамашалап жатасыңар го.
- Кандай тамашалап?
- Бирөөгө телефонумду берип, мени тамашага салган жоксуңарбы?
- Жо-ок эже, мен сизди тамашалап эмне кылмак элем.
- Эже унутуп кала элегимде айтайын дегем. Боло турган кечеге түрк ырчылары да келет. Анан кечеде кийген костюмдар да бизден болот. Сиздин фигураңыздын өлчөмүн билсек болобу?
- Ха-ха-ха, мен өзүм деле өлчөп көрө элекмин. Мен негизи жалгыз ырдабайм да, Мүзүр менен чогуу ырдасак , ага да костюм тиктирип бересиңерби?
- Мүзүр деген ким ? Сиз менен чогуу ырдайбы?
- Ииии, "Кызыл гүл" деген ырды экөөбүз чогуу ырдайбыз.
- Негизи костюмду сизге эле деп жатышкан. Мен алар менен сүйлөшүп көрөйүнчү. А сиз жалгыз ырдап бере албайсызбы?
- Жоок, ал ырды экөөбүз гана ырдайбыз.
- Башка жалгыз ырдаган ырларыңыз жокпу?
- Бир эле ырым бар жалгыз ырдаган. Бирок, мен эч качан өзүм жалгыз барып ырдап көрө элекмин да. Бир гана күйөөм менен барам да.
- Ал сиздин жолдошуңуз болобу?
- Ал менин жолдошум, экөөбүз бир топто, дуэт ырдайбыз. Мени Гүлмира деп эч ким тааныбайт. "Кеңеш тобу" дегенде эле тааныбаса…
- Анан сизди жетекчим кандайча таанып алган?
- Болгондо да жетекчиңиз мени тааныптырбы ээ?
- Ооба. Анда мен сизге бир аз убакыттан кийин чалайын, сиз фигураңыздын өлчөмүн ченеп, анан мага айтып коёсуз да.
- Жо-ок, мен сага айтпадымбы барбайм, фигурамдын өлчөмүн да айтпайм. Эгер барсам күйөөм менен гана барып ырдап келем. Форма өзүбүздө деле бар, алар тиктирбей эле койсун.
- Негизи костюмдар алардын эсебинен, ага эч кам санабаңыз.
- Алар эмне жакшы кылып тигип беришеби?
- Эми кечеге ылайыкташтырып, бир аз "сексуальный" болуп кетет.
- Ай-иий, жок, мен андайды кийе албайм.
- Сиздин фигураңыз жакшы турбайбы, эмнеге болбойт?
- Жо-ок, болбой калат го. Мен кийсем тиземден ылдый, жабык кийем. Күйөөм намаз окуп жатса, элестет мен ачык кийинип алып, ресторанда түнкү саат экиге чейин жүргөнүмдү.
Ушул убакта Гүлмира эженин жини келе баштаганда "Обон" гезитинин тамашалап жатканын айтып, жоошуттук.






  Оюндан от чыкты беле?

Ушул суроо менен кайрылганда Нурдөөлөт мырза каткырып, бизге төмөнкү тамашалуу окуяларды айтып берди.
Нурдөөлөт Копоев, актер:
"Сууга барсам, тишим ооруйт"
Негизи бир гана оюндан эмес, сөздөн деле от чыгып калышы ыктымал экен. Бул окуя жакында эле болду. Өзүмдүн айылыма эс алганы барып калдым, анан кичүү иним: "Жүрүңүз мени менен сууга барып келиңизчи, жалгыз баргандан ээригип атам" деп суранганынан, "Ой, жок, мен сууга барсам тишим ооруйт" деп тамашалап, барбай койгом.
Кечинде келин бала манты жасап, мени конокко чакырып калышты. Анан бышып турган тамактан жейин десем эле тишим ооруп туруп алса болобу. Мына сага, мантыны жегим келгенин айтпа, же тишимдин ооруганы токтобой, араң эки манты жеп тим болдум. Эртеси, өзүмө келгенден кийин, бир күн мурунку иниме айткан сөзүмдү эстеп: "Ойноп сүйлөйм деп жатып, онтоп калдым" деп күлүп жатпаймынбы.

"Бир кызды ала качып тамашалайбыз деп …"
Анда 2007-жылы эле. "Нукура кыргыз" теле долбоорун уюштуруп, Ысык-Көлдөгү "Кырчын" жайлоосунда болгон окуя. Күнүгө эле сьемка кылалы десек , күндүн бети ачылбай, жаан жаап туруп алды. Долбоорго катышуучулар да көңүлдөрү жок, аябай эригишип кетишти. Бир күнү кечинде, тамаша уюштуруп, эки команданын балдарын, кыздарын бири-бирине кудаламай болуп, сюжетин түзүп, биринчи командадагы кызды экинчи командадагы бала ала качмай болду. Балдардын баары кызды көтөрүп алып чыркыраткан боюнча, экинчи чатырга киргизип, отургузуп коюшту. Тиги кыз аябай ыйлап, отурбайм деп жатып, аягында тынчып калыптыр. Анан бир кезде эле, "Чакыргылачы, мага үйлөнө турган баланы" деп кыйкырды. Эшиктен баланы чакырып, биз сыртка чыгып, экөөнүн сүйлөшкөндөрүн тыңшап жатсак, "Сен үй-бүлөңдө канчанчы баласы болосуң, эгерде кичүүсү болсоң, мен сага тийбейм" деп чыкты. Анда бала, "Мен кичүүсү болом, ата-энем менен жашайбыз" деп койсо, унчукпай калды да, "Анда мен өзүмдүн туугандарыма чалып айтайын мейлиби"- деп ишенип алыптыр. Биз чыдабай кетип, оюндан от чыга электе өчүрөлү деп тамаша экенин айтып, видеого жазылып калган кадрларды көргөсөк, чындап ишенип алган кыз, ызаланып ыйлап жиберди. Кийин долбоор бүткөнгө чейин, тамашалап койсок, көпкө чейин уялып "бул тамашаны бизден башка эл билбесин" деп жүрдү.





Билгениң оң
Узак жашоонун бешинчи сыры бул -күлкү.
Адамдарды оорудан алдын алуунун бири болуп күлкү эсептелинет.
Күлкү- бул дем алууну жакшыртып, жүрөк оорусунун алдын алганга жана бардык ички органдарга жана муундарга массаж катары колдонулат.
Иммунитетти көтөргөнгө да күлкүнүн пайдасы зор экен.
Депрессия менен стресстен арылуунун бир гана жолу бул - күлкү.




  Икая

Өлүмгө күлө караган достор

Илгери кытай жергесинде үч күлкүчү жигит болуптур. Алар таң аткандан баштап, күн батканга чейин күлгөндөн жана элге күлкү тартуулагандан эч тажашпаптыр. Күнүгө ар бир айылды кыдырып, жини келип, урушуп жаткан адамдарга күлкүлөрүн тартуулап, алардын маанайын көтөрүшөт. Күндөрдүн биринде, үч жигиттин бирөөсү каза болот. Айылдын жашоочулары кайгырып атса, эки досу каткырып, бийлеп, жыргап жатышканын көргөн элдер: "Бул жерде досуңар каза болуп жатса, кайсы ырысыңарга шатыра-шатмансыңар?" деп жиндери келет. Анда достору: "Биз эң биринчи ким өлөт болду экен деп, мелдешчү элек. Мында да ал бизден алдыга озду. "Өлгөнүмдө силер жыргабасаңар, мен силерди жыргатам. Мен өлгөндө эч качан ыйлабагыла жана сөөгүмдү кийип турган кийимим менен кошо өрттөгүлө" деди эле. Анын керээзин аткарып, күлкү менен узатышыбыз керек" дешип, ого бетер каткырып-жыргай башташат.Чогулган эл өлүктү өрттөп баштаганда, күтүүсүздөн фейверктер атылып, айлана-чөйрө кооздукка чөмүлөт. Көрсө, маркум өлөр алдында кийиминин ичине фейверктерден катып, элдин көңүлүн көтөрөйүн деген экен. Кайгырып турган элдин маанайлары көтөрүлүп, күлкүчү жигит аркы дүйнөгө кетип жатса дагы, жакшы маанай тартуулаганды унутпаптыр деп ыраазы болушуптур.
Күлкү искусствонун бир түрү болгондуктан, элдерге жакшы маанай тартуулаганды да билиш керек.
"Эгерде силер кайгыны күлкүгө айландыра алсаңар, анда өзүңөрдүн өлүмүңөрдү жыаңы төрөлүүгө айланаткан менен барабар. Күлкүнү тыя турган эч нерсе жок. Жада калса, өлүмдү да күлкү менен узатса болот"- деген экен белгилүү бир кытай философу.

Айзат Кыдыралиева




кыргыз тилиндеги гезит "Обон"









??.??