п»ї

  Чырдөбө

"Ударный" ушактарга жооптор
3 жашынан бери чоң сахнанын ысык-суугуна атасы менен чогуу чыдап келе жаткан Расул кызы Айгерим буларды айтып өттү: "Тойлорго жалгыз барбайм. Апам дайыма жанымда жүрөт. Эгер апам жок болуп калса, атам менен барам. Кыска кийингенден Гүлнур Сатылганова эже мага үлгү болгон". Кызы менен энесинин көөдөнүндөгү букту, Айгеримдин артынан калбай ээрчиген ушактардын чын-төгүнүн даана билели деген максатта сөзгө тарттык.

Катя,апасы: "Ырчылардын кайсы ойношу
машина сатып берип жаткандарын жакшы билем"

"Айгерим жөнүндө айтылган ушактарга өздөрүнө жараша жооп берем"
- Катя эже, Айгеримди кандай кармайсыз?
- Элдин баары эле мени катуу деп ойлошот. Менин кызым элге окшоп, дискотекаларга барбайт. Курбу кыздарынын туулган күнүнө чакырып калганда деле барып, белегин берип, ырын ырдап коюп кетип калат. А мен кызымдын баскан-турганын, кийингенин дайым көзөмөлгө алып турам.
- Эл адамы болгондон кийин, сөзсүз түрдө анын жаман жагын сындаган сынчылардын саны арбын болот эмеспи. Айгеримди да сындагандар жок эмес.
- Ооба, сынчылардын саны өтө эле көп десем жаңылышпайт болушум керек. Кыргыздар кызыктуу болуп, жаңыдан көтөрүлүп, эл оозуна алынып келе жаткан адамга жабышып алышат. Бул ата-бабабыздан бери келе жаткан көнүмүш адат. Айгеримдин ар бир ырына жарашыктуу көйнөктөрү бар. "Кыска киет" деп да чыгышты. Айгерим эми-эми он тогуздун босогосун аттап жатат. Азыр кыска кийбегенде, Гүлнурга окшоп кырктын кырын ашканда киеби? Өткөндө силердин гезитке Гүлнур: "Айгеримдин кийимдери мени канааттандырбайт", - деп жазыптыр. Мисалы, Айгеримдин күйөрмандары Гүлнурду жактырбайт. Гүлнурдуку болсо, Айгеримди сүйбөйт дегендей. Гүлнур ырдаган ырды Гүлнур өзү гана ырдаса, Айгерим ырдаган ырды кыргыздын кичинекей баласына чейин ырдап жүрөт. Кырктан ашкан аялдын, "Айгеримдин мындайын каалабайт элем", - дегени таң калтырып жатат. Айтылып жаткан, "Айгерим эрге тийди, Айгерим Америкага кетти", - деген ушактардын, имиштердин баары, чыгармачыл адамдардын ичинен былгып чыккан сөздөр экен. Ушундай арам ушактарды жараткандардын баарына "байкот" жарыяладым. Гүлшайыр эже да, "Индиянын кинофильмдерине басым жасайт" дептир. Мен билгенден "Кыз Бурак" тобу, өмүр бою өзбектердин ырын которуп ырдап жүрүп, ушул деңгээлге жетти. Сиздердин "Обон" гезити аркылуу, Гүлшайыр эже Өзбекстанда Жылдыз Усманованы жетелеп, Кыргызстанга чакыра берип, Жылдыздын кыргыздарга берген жообун уктуңар. Ошондой нерселерди гезит аркылуу эмес, менин өзүмө келип айтса, мен ал сындарды туура кабыл алам да. Айгерим 45-55ке чыгып ошондой ачык кийинип алса, башкача болмок. Тата Уланды башында көргөндө эле: "Ушул бала клоунга окшобой, эркектей эле болсо", - деп айткам. Азыр болсо: "Кыздарга сын айткандан мурун, эркекке окшоп, бетиндеги маскасын чечип алсын", - дээр элем. Чыгыш бийи андай көйнөк менен кылымдан-кылымга келген. Анан жарым жылаңач дептир.Элдин кыздарына окшоп жигиттен-жигитти жандап, машине алдыртып, тамеки чегип жүргөн жок.
"Эмне үчүн Айгерим тойго көп чыгат? Бирөөгө жакшы көрүнгүсү келет, ошон үчүн", - деп бир гезит жазыптыр. Анан ал журналистти чакырып алып "Бул ушакты кайдан уктуң? Сен менин адвокатым менен гинекологиялык экспертизага барасың, анан кимдин-ким экенин көр, андан кийин жаз", - дегенимде, "Эже, өзүңүздөрдүн эле артисттериңиз келип, ушинтип айткан. Анын атын атасам катуу уруш чыгат. Сыр боюнча эле калсын", - деп айтпай койгон болчу. Артист болуп, жакшылык-жамандыкта кошо жүрүп, бир жерден нан таап жеп жатып, ушундай ушактарды чыгарып жатышса, мен да андайга даярмын. Себеби, мен ар бир артисттин каерде кантип акча таап, каерде ким менен жүргөндөрүн, жада калса эмне менен дем алып жатканына чейин билем. "Мага жигитим машина сатып берди, үй сатып берди", - дегендердин кайсы жигити, кайсы ойношу сатып берип жаткандарын дагы жакшы билем. Бирок мен аларчылап гезит беттерине жаздырган жокмун.
- "Бакиевдердин үй-бүлөсү Айгерим биздин гана тойлордо ырдашы керек", - деген коркутуулар чын эле болду беле?
- Ушундай ушактардан чарчап бүттүм. Бакиевдер тарабынан эч кандай коркутуу-үркүтүү болгон эмес. Ата-энеси жанында турганда, эч бир себепсиз коркутуп көрсүнчү. Бирөө менен ашыкча сүйлөшүп, жигит менен кол кармашып жүрбөсө, эч кимге жамандык кылып, бирөөнү жамандабаса, кайсы кылмышы үчүн коркутат? Биздин чыгармачыл адамдар ушундай сөз жүргүзүп, белгисиз бир себептер менен Айгеримди ушунчалык каралагысы келишти. Ак ийилет, бирок сынбайт. Кыргыздын тарыхында деле кайсы өрөөндөн, шаардан татынакай кыз чыкса, хан же башкарма кызды токолдукка алып койгон. А Айгеримдин көзгө көрүнүп турган кези. Ошондон улам "болду-болбоду, "ушулар" алып коёт болуш керек", - деген божомол менен мындай имиштерди чыгарып жатышат. Кечээ да радиодон телефон чалып: "Катя эже, Айгерим шаардабы? Максим келип Америкага алып кетиптир го?" - деген да ушагын чыгара коюшуптур. Максим өзүнүн атын таппай жүрсө, Айгеримди каякка алып кетмек эле? Максимди Айгерим эмес, анын ата-энеси биз телевизордон гана көргөнбүз. А Максим Канттын күйөө баласы экенин элдин баары билишет.
- "Курманбек Бакиев Германияда ооруп жатканда, Орозгүл Токторбаева Айгеримди ал жакка алып барган", - деген да ушактар жүрөт.
- Орозгүл Токторбаева Жаныш Бакиевдин аялы экенин билем. Жаныш эле эмес, башкалардын аялдарын да жакшы тааныйм. Баардыгы менен той-топурда саламыбыз түз болчу. Жаныш жок болгондон бери, Орозгүл да жок болду. Анын каякта экенин да билбейбиз. Бул сөздү биринчи жолу угуп атышым. Расул элдин астында ырдаганына 25 жыл болду. Кайсы жерде той болбосун, кыргыз элинин жакшылыгында гана жүрүшөт. Биз үчүн кыргыз эли аман болсун! Элитанын тоюна гана барабыз дегендерге кошула албайм. Элдин артынан артисттер адам болуп жатат. Азыр концерт деле койбой калышпадыбы. Анткени, артисттерди эл багып атат. Ушул нерседен дагы пайдаланып кетейин. Кара-Жыгач жаңы конушунан жер алып, жайкы кафе ача калганбыз. Чыгармачыл адамдар, "Ал кафени Максим сатып берген. Анан алар бийликтен кеткенден кийин бүтпөй калды", - деп ушак таратып жиберишти. Ал жер 2004-жылы Акаевдин мезгилинде аукциондон утуп алган жер болчу. Биринчи комиссияга салып, аукционго өтүп, аукциондон утуп алган жер. Анда Максимдин жыты дагы жок болчу. Бакиевдин мезгилинде кредит да ала алган жокпуз. Кудайга шүгүр, элден айланып кетсе болот. Эл тойго чакырып, акча берип, тапкан акчабызга элчилеп "особняк" салдырбай, кичинеден чогултуп атып, элге кереги тие турган студия куруп атабыз. Ошону да көрө албагандар ар кандай сөздөрдү чыгарышты.
Ушундан пайдаланып, Айгеримдин күйөрмандарынан суранып кетер элем:"Ким Айгерим тууралуу ушак таркатып жатса, уюлдук телефонго жаздырып, "Обон" гезитине алып келсеңиздер, акчалай сыйлык күтөт. Сиздердин аты-жөнүңүздөр эч кимге айтылбайт".




Айгерим Расул кызы:
"Ырларым элита үчүн эмес"
- Айгерим, ырдап, бийлеп жатып, ырыңдын текстин унутуп калган учурлар болобу?
- Андай учурлар болот. Бирок ыр менен бийди кошо алып кетүү абдан эле кыйын. Ырдап жатып, бийлесең, дем жетпей калат.
- Анда дискотекадан чыкпайт турбайсыңбы?
- Жок, дискотекаларга такыр барбайм. Бий студияма барып,эч ким жокто музыканы чоңойтуп алып бийлегенди жакшы көрөм.
- Кайсы майрамды салтанаттуу белгилейсиңер?
- Жыл сайын жаңы жылда мен "оливье", апам "фунчёза" жасайт. Биз кичинекей кезде, ресторандарга "заказ" кылып, ошол жактан тосчубуз. Азыр болсо, кандай гана майрам болбосун үйдөн белгилейбиз.
- Өзүңдүн чыгармачылыгыңа кандай баа бересиң?
- Менин ырларым элита үчүн эмес, жөнөкөй кыргыз эли үчүн. Ушул ырларым хит болсун деп, күнүмдүк колдонулган сөздөр менен ырдап жүрөм. Буга атамдын салымы чоң.
- А сени сындагандарга эмне дейт элең?
- Мен Гүлнур эженин эки-үч клибинде узун өтүк менен кыпкыска юбка кийип алып ырдаганын көрүп, апама "мага ушундай юбка тиктирип бериңизчи" десем, "Бул өтө кыска экен, сен узунураак кий" деп узун тиктирип берген. Кыска кийингенден Гүлнур эже мага үлгү болгон. А Тата Улан катынга окшобой, маскасын чечип, анан сын айтса болмок. Ал мени сындай турган деңгээлге жете элек жана жетпейт дагы. Мен Татаны чыгармачыл адам катары кабыл албайм.

Төлөбүбү Касымалиева






кыргыз тилиндеги гезит "Обон"









??.??