п»ї
 Таанышуу жарыясы


  Клип таржымалы

Сыймык Бейшекеев:
"Клиптеги каармандар мен үчүн сыр бойдон калган"
Ырдын жаралышы
"Ак көйнөгүң кийип кел" деген ырымдын уландысын "Жоолукчан" деп чыгарганбыз. Ырдын сөзүнүн идеясы жана обону мага таандык. Бирок толук сөзүн "Күзгү нөшөр" деген ырымды жазган акын Бактыгүл Сейитбекова эже жазган. Мен Россияга гастролдоп барганда, ал эже дагы ошол жакта жүргөн экен. Анан ал эжеге жолугуп:"Аты жогуң шакек тагынып",- деген саптары бар ыр жазып бериңизчи деп идеясын сунуштап калдым.

Клип тууралуу
Ал эми клипке кайрылсам, аны Бекбол Болотов деген мырза тарткан. Ошол убакта, жайында, кымыз ичип, эс алып келейин деп Токтогулга кеткени жаткам. Анан Бекбол Болотов келип: "Клип тарталы, байке",- деп сунуштап калды. Мен макулдугумду бердим дагы, идеясын айтып, камераларды алганга жана артисттерге төлөгөнгө акчасын берип кетип калдым. Баш аягы миң доллар кеткен. Бизге идея боюнча, жалгыз дарак бар жер керек эле. Нурдин деген режиссёр жигит бир жума мурда барып көрүп, анан ошол жер жаккандан кийин, эки-үч күн тартышкан. Клип тартылган аймак Чоң-Арык айылынын үстүндө жайгашкан жана мурда бул жерде бир кыргыз киносу тартылган экен. Клиптин таржымалы болсо, ырдын өзү айтып тургандай эле, мурда жолугушуп жүргөн кыз-жигит, көп өтпөй жолугуша турган жерде жигит жалгыз талдын жанында күтүп жатканда, кыз башына ак жоолук салынып келет.

Клиптеги каармандар
Клиптеги кыз менен баланы режиссёрлор өзүлөрү табышкан. Болгону кыз акырында жоолук салынып бир машина менен келген жери бар, ошол машина менин досумдун машинасы. Башкы каармандарды ушул убакка чейин көрө элекмин, мен үчүн сыр бойдон кала берди. Дагы менин башкы сунушум, мен жөнүндө ырым эле кетсин, мени элим үнүм аркылуу таанышсын деп айтып кеткем. Тартылып бүтүп даяр болгондон кийин гана келип көрүп, канааттандырарлык эле жаккан. Негизи, миң долларга ошондой деңгээлдеги клип тартылат да. Мен ошого ыраазы болдум, тарткан балдар алган акчасына ыраазы болду. Клиптин аягы "Ак жоолугуң башыңдан түшпөсүн" деп ырдын акыркы саптарында айтылгандай эле, каалоо-тилек катары баяндалып бүтүп калат.

Келсин Мурадил кызы




кыргыз тилиндеги гезит "Обон"









??.??